In de School (vör oewer hunnert Johren)

Lehrer: Hüüt willen wi ees dorvon räden, wie dat in’t Läben so mit de Verantwortung is. Dat is nämlich ganz wat Wichtiges. Wecker kann uns also verklorn, wat Verantwortung is? (Keiner meldet sich.) Wat? Keeneen meld’t sich? Nu gäwt juch mal ’n bäten Mäuh! Ji koent ok een Bispill nennen. Weet eener een Bispill? (Hannes meldet sich.) Jo, Hannes, denn fang man an.

Hannes: Also, Herr Schult, dat is so: Hier is miene Büx. Un dor sünd ees fief Knöp anwäst. Veer sünd afräten. Eenen is noch an. Jo, un de dröggt nu de Verantwortung.

(Es klopft, Fritz kommt herein.)

Fritz: Goden Morgen, Herr Schult.

Lehrer: Ach, kiek an, uns Fritzing kümmt ok ees wedder in de School. Segg mol, wo hest du di in de letzten dree Dag denn rümdräben? In’n Busch Höhlen bugt – orrer wat? Na, töw man, kannst di de Hosen all stramm trecken. Nu giwt wat mit’n Stock!

Fritz: Nee, nich, Herr Schult, ick heww jo ’ne Entschulligung. Ick künn nich na de School kommen, wiel mien Vadder bi dat Supen in de Kneip wat up’t Muul krägen hett.

Lehrer: Wat hest du dormit to don? Du lüggst doch!

Fritz: Nee, is allens de reene Wohrheit! Ick müsst mit mienen Vadder mit up dat Feld, plögen gahn.

Lehrer: Wat? Plögt hebben doch woll dat Peerd un dien Vadder. Wat also dedst du dorbi?

Fritz: Na, ick müsst doch ümmer „Prrr“ to dat Peerd seggen!

Lehrer: Denn sett di man hen, ick mütt woll ees mit dienen Vadder räden. Un mit dienen ok, Stine. He hett mi up eenen Zeddel schräben, dat du morgen mitgahn sallst to’n Tüften buddeln. Dor büst du doch väl to schwach to.

Stine: Ach, Herr Schult, maken Se sick man keene Sorgen. Ick sall doch blots uppassen, dat dor nich grad de Schandarm vörbikümmt…

Mehr Sagen und Texte unter www.mieneplattsiet.de

Karin Albrecht